108 ఏళ్ల వ్యాపారం.. తరాలు మారినా యాజమాన్యం మారలేదు!

అమెరికాలోని ఇండియానా రాష్ట్రంలో ఒక కుటుంబం గత 108 ఏళ్లుగా తమ వ్యాపారాన్ని విజయవంతంగా కొనసాగిస్తోంది. మొదటి ప్రపంచ యుద్ధం ముగింపు దశలో, అంటే 1918లో ముగ్గురు సోదరులు ఒక చిన్న సైకిల్, టైర్ల దుకాణంగా దీనిని ప్రారంభించారు. నేటికీ అదే కుటుంబం ఈ వ్యాపారాన్నినిర్వహించడం విశేషం.

ఈ సంస్థ సాధించిన విజయాల్లో ఉద్యోగుల అంకితభావం కీలకపాత్ర పోషించింది.
ఇక్కడ పనిచేసిన ఆరుగురు ఉద్యోగులు సుమారు 40 ఏళ్లకు పైగా సేవలు అందించి పదవీ విరమణ పొందారు. మరికొందరు ఏకంగా 50 ఏళ్ల పాటు ఇదే సంస్థలో కొనసాగడం విశేషం. ఒకే కుటుంబానికి చెందిన పలు తరాల యాజమాన్యాల వద్ద వీరు సుదీర్ఘకాలం పాటు పనిచేయడం గమనార్హం.

సైకిల్ ఫ్రేమ్‌లు, ట్యూబ్‌ల మరమ్మతులతో ప్రస్థానాన్ని ప్రారంభించిన ఈ సంస్థ, ఆటోమొబైల్ రంగంలో చోటుచేసుకున్న మార్పులకు అనుగుణంగా ఎప్పటికప్పుడు తనను తాను ఆధునికీకరించుకుంది. 1918 నాటి ఇన్ఫ్లుయెంజా మహమ్మారి, మహా ఆర్థిక మాంద్యం, రెండో ప్రపంచ యుద్ధం వంటి ఎన్నో చారిత్రక సవాళ్లను తట్టుకుని ఈ వ్యాపారం పటిష్ఠంగా నిలదొక్కుకుంది.

ప్రస్తుతం డిజిటల్ యుగంలో ఇ-కామర్స్, ఎలక్ట్రిక్ వాహనాల వినియోగం పెరిగినప్పటికీ, ఈ సంస్థ విజయపథంలో దూసుకుపోతోంది. సంప్రదాయ నైపుణ్యాలకు ఆధునిక సాంకేతికతను జోడించి యువ మెకానిక్‌లకు శిక్షణ ఇస్తోంది. దిగ్గజ రిటైల్ చైన్‌లు, ఆన్‌లైన్ వ్యాపారాల నుంచి ఎదురవుతున్న తీవ్ర పోటీని తట్టుకుని, ఒకే కుటుంబం శతాబ్దానికి పైగా వ్యాపారాన్ని విజయవంతంగా నిర్వహించడం అరుదైన విషయమని విశ్లేషకులు అభిప్రాయపడుతున్నారు.